Босния және Герцоговина елінен келген "Қайсардың" қорғаушысы Градимир Црногорац келер жылы Қызылордада доп теппейтін секілді. Ол өзінің "Фейсбуктағы" жазбасында 2,5 жыл Қазақстанда ойын көрсеткенін, өзінің оған риза екенін жеткізген. Барлық жанкүйер қауымға білдірген қолдауына ризалығын айтыпты. 

Үш жылға жуық уақыттың екі жылын босниялық футболшы Қызылордада өткізді. Негізгі құрамның ойыншысы болды. Ол биыл біріншіліктің 21 ойынында жасыл алаңға шықты. Қарсылас ұжымдардың қақпашыларын 4 мәрте қапы қалдырды. Бірнеше ойында команданы алаңға бастап шықты. Капитандық міндетті атқарды. 

Қысқасы, Градимир "Қайсардың" көшбасшы футболшысының бірі болып еді. Ия, оның мұндай шешім қабылдауында сыр бар. Қазақстан футбол федерациясының талабы бойынша 30-дан асқан шетелдік футболшы біздің біріншілікте ойнай алмайды. Ал Градимир болса, биыл орда бұзар отыздан асты.